20 шілдеге қараған түні Мәскеудің солтүстік-батысындағы Зеленоград ауданына украин дрондары шабуылдады. Ақпаратқа қарағанда, дрон құлаған жерлерде екі көлік өртенген, көп қабатты тұрғын үй бүлінген.
Зардап шеккендер жөнінде ақпарат жоқ.
Мәскеу мэрі Сергей Собянин әуе қорғаныс жүйесі түнде Мәскеуге бағыт алған 16 дронды атып түсіргенін хабарлады. Тағы бесеуі 19 шілде кешке құлатылған. 20 шілдеде таңертең дрондарды жою жалғасып жатқанын айтты.
Мәскеудегі Шереметьево, Внуково, Домодедово және Жуковский әуежайларында сенбі кешке және жексенбіге қараған түні ұшақтарды қабылдау мен ұшыруға шектеу қойылды. Әуежайлар бірнеше сағатқа жабылып, таңға қарай шектеулер алынды.
"Аэрофлоттың" хабарлауынша, шектеуге байланысты Шереметьево әуежайында компания "кестені түзеуге мәжбүр болған". "Победа" әуе компаниясы да соған ұқсас хабар таратты. Росавиация мәліметінше, өткен тәулікте запастағы аэродромдарға 134 ұшақ жіберілген.
Ресей қорғаныс министрлігінің мәліметінше, 20 шілдеге қараған түні Ресей күштері елдің түрлі аймағында 93 украиналық дронды атып түсірген. Украина әскері әзірге түсініктеме бермеді.
Жуырда дрондардың шабуылынан Ростов облысындағы темір жолда байланыс желісі бүлінген. Соның салдарынан сенбі кешке 75-тен астам жолаушылар пойызы кешіккен.